Katiba Mpya kumaliza malalamiko ya pande zote za Muungano

Spika  wa Baraza la Wawakilishi la Zanzibar Mhe Pandu Ameir Kificho amesema  zowezi linaoendelea la  ukusanyaji wa maoni kuhusiana na Katiba Mpya ya Jamhuri ya Muungano wa Tanzania  linalenga kupata Muungano mzuri zaidi  utakaomaliza  malalamiko ya pande zote za Muungano huo.

Spika Kificho amesema hayo leo wakati akizungumza na Balozi wa Canada hapa nchini Bw. Alexandre Leveque huko  Ofisini kwake Chukwani  nje kidogo ya mji wa Zanzibar.

Amesema  zowezi hilo linaendelea vizuri  ambapo wananchi na makundi mbali mbali  yanaendelea kutoa maoni yao  kuhusiana na Katiba Mpya  pamoja na mwelekeo wa Muunndo wa Muungano wanautarajia  ambao wanahisi utaleta maslahi zaidi kati ya Tanzania Bara na Tanzania Zanzibar.

Amesema  Muungano wa Tanzania ni wa pekee ambao unahitaji  kutunzwa na kuendelezwa  ingawa wananchi wamekuwa na mawazo tofauti juu ya mfumo wanaouhitaji .

 Mhe Kificho amesema katika  kuudumisha Muungano huo ni vyema    kuyapatia ufumbuzi malalamiko ya kila upande  ikiwa ni pamoja na kufahamika vyema mambo ya muungano na yale yasiyokuwa ya Muungano.

Amefahamisha kwamba zowezi la uchukuaji wa maoni ni muhimu  kwa wananchi na kutokana na umuhimu  huo Baraza la Wawakilishi la Zanzibar chini ya ufadhili wa Serikali ya Norway  limechukua  juhudi ya kutoa elimu ya katiba pamoja na kutayarisha kitabu maalum cha Elimu ya Katiba ili  kuwapamwangaza wananchi hao kuhusiana na Katiba yao.

Kwa  upande wake Balozi  Alexandre  Leveque amesema  mpango wa kukusanya maoni ya wananchi wakati wa kuunda katiba ni jambo zuri lenye kuonyesha kukomaa kwa demokrasia hapa nchini.

Amesema  nchi yake inatarajia kuona Watanzania wanapata katiba yenye mafanikio ambapo Canada itafuatilia kwa karibu mwenendo wa mchakato wa Upatikanaji wa katiba mpya na nchi hiyo itatoa kila aina ya ushirikiano  ili kuhakikisha kwamba zowezi hilo linafanikiwa.