‘Zanzibar iwekeze utalii wa gofu’

Na Mwantanga Ame

 

KAMISHENI ya Utalii Zanzibar, imeshauriwakuangalia uwezekano wa kutafuta wawekezaji watakaoweza kuanzisha utalii kupitia mchezo wa gofu.

 

Ushauri huo umetolewa na Makamu wa Pili wa Rais wa Zanzibar Balozi Seif Ali Iddi mbele ya viongozi wa Kamisheni hiyo, alipokuwa katika uwanja wa ndege wa kimataifa wa Abeid Amani Karume, mjini Zanzibar.

 

Balozi Seif, alisema ipo haja kungalia namna ya kuwekeza katika utalii wa mchezo huo, ambao uliipatia sifa sana Zanzibar miaka ya nyuma, ingawa kwa sasa unaonekana kusahaulika.

Alieleza kuwa, baadhi ya mataifa duniani, yamepata mafanikio makubwa kiuchumi kutokana na kutumia utalii wa gofu, hivyo ni vyema Zanzibar iufanyie kazi ushauri huo.

 

Ili kufanikisha azma hiyo, alisema ni vyema wizara inayoshughulikia michezo na utalii, katika mikakati yake ya miradi ya maendeleo, iandae mpango wa kumiliki angalau uwanja mmoja wa mchezo huo, wakati serikali ikiendelea na jitihada za kutafuta wawekezaji katika eneo hilo .#

 

“Inasikitisha kuona michezo mingi ya ndani iliyoiletea sifa Zanzibar ikiwemo gofu, hoki, riadha na mpira wa miguu, ama imekufa au inasuasua”, alifahamisha.

 

Kwa upande wake, Naibu Katibu Mkuu Wizara ya Habari, Utamaduni, Utalii na Michezo, Issa Mlingoti Ali, aliahidi kuufanyia kazi ushauri wa Balozi Seif, na kukumbusha kuwa, serikali kupitia taasisi ya Uwekezaji Vitega Uchumi iliwahi kupokea maombi ya wawekezaji watatu waliokuwa na nia ya kujenga viwanja vya gofu, lakini haifahamiki mpango huo ulikoishia.