Makamanda wataoshindwa kuwakamata wachochezi kutimuliwa

Na Mwandishi wetu

WAZIRI wa Mambo ya Ndani ya Nchi, Dk. Emmanuel Nchimbi amewaagiza Makamanda wa Polisi Mikoa, Wilaya na Wakuu wa vituo nchini, kuwakamata na kuwafikisha mbele ya vyombo vya sheria watu wote wanaotumia majukwaa ya dini kukashifu dini nyengine.

Akinukuu msemo wa Kiswahili kuwa ‘ukicheka na Kima utavuna mabuwa’, Dk. Nchimbi alisema serikali haitacheka tena na watu wanaotaka kuitumbukiza Tanzania katika migogoro ya kidini, na kusema yeyote atakaefanya hivyo sasa atakamatwa.

Aliwaonya watendaji hao wa polisi kwamba watafukuzwa kazi, iwapo serikali itasikia kwenye mkoa, wilaya au kituo kuna matukio hayo huku viongozi hao wakishindwa kuchukua hatua.

“Tukisikia kwenye eneo lako matukio haya yamefanyika bila ya kuchukua hatua, utakwenda na maji, hatuwezi kucheka na watu wanaochochea chuki na kutaka kutugawa,”alionya Dk. Nchimbi.

Aidha aliwaonya watumiaji wa mitandao ya kijamii kujiepusha na lugha za chuki na uchochezi huku akisisitiza kuwa serikali imekubaliana na taasisi husika kuanza kuwakamata watu wanaotuma ujumbe mfupi wa simu (sms) unaochochea chuki.