Kesi ya Mfaransa aliedaiwa kushambulia yapigwa danadana

Na Abdi Shamnah

MAHAKAMA ya wilaya Makunduchi, imeahirisha tena kesi  ya shambulio la kuumiza mwili, inayomkabili mshitakiwa Ivan Kode (35), raia wa Ufaransa hadi Februari 12 mwaka huu, ili kupata muda wa kupitia ombi linalobishaniwa na upande mbili za mahakama.

Mshitakiwa Ivan Kode, anatuhumiwa kuwashambulia kwa kuwapiga bastola yenye risasi za chubwi, Nadir Ali Juma, Ashraf Suleiman Yussuf, Wadi Ame Khamis na Ally Ramadhan Mohammed na kuwasababishia maumivu makali mwilini.

Katika mahakama hiyo iliokuwa chini ya hakimu Mohammed Ali Haji, Wakili wa  mshitakiwa huyo Elizabeth Lazaro Mayalla, aliiomba mahakama kutoa idhini ya kukabidhiwa paspoti mteja wake ili aweze kusafiri nje ya nchi kwa matibabu.

Alidai  hali ya afya mteja wake ambae hajafika mahakamani hapo kwa takriban vikao vinne sasa  tangu alipotoka mahabusu na kupewa dhamana, haiko vyema hivyo anahitaji matibabu ya ziada nje ya nchi.

Wakili huyo  (bila ya kueleza maradhi yanayomsumbua mteja wake), alidai mbali na  mshitakiwa kuwepo Zanzibar, ameshindwa kufika mbele ya mahakama hiyo kutokana na sababu za kiafya.

Mayalla aliwasilisha mahakamani hapoi ‘board pass’ pamoja na kipande cha tiketi alichotumia mshitakiwa katika safari yake, kuthibitisha ukweli wa hoja yake na nia aliyokuwanayo kuhudhuria katika kikao hicho.

Hata hivyo, ombi la Wakili huyo lilipata upinzani mkubwa kutoka upande wa mashataka, pale Muendesha mashtaka,Mkaguzi Msaidizi wa Polisi,  Abdulkadir Miradj alipoiomba mahakama kuwa makini na ombi lililowasilishwa kwani huenda kuna mbinu zimepangwa kumpa fursa mshitakiwa kutoroka.

Aliiomba mahakama kuzingatia mwenendo wa mshitakiwa  mahakamani hapo ambao alidai unatia mashaka, hivyo kuwepo wasiwasi wa kutoroka na kuwakosesha watu wengine haki, pale atakakabidhiwa paspoti hiyo.

Alidaini vikao vinne sasa mshitakiwa hajafika mahakamani kwa kizingizio cha ugonjwa, hali inayotia mashaka juu ya hatma ya kesi hiyo.

Akitoa ufafanuzi baada ya kuibuka hoja zinazopingana, Hakimu Mohammed aliwataka wadhamini wa mshitakiwa kuhakikisha wanamfikisha  mahakamani siku iliopangwa.

“Wadhamini wahakikishe siku hiyo mshitakiwa anafika mahakamani bila ya kukosa na ndipo  nitatoa uamuzi juu ya hoja inayobishaniwa ya kumkabidhi paspoti yake ili aweze kwenda nje kwa matibabu,” alisema.

Aidha alisema mashahidi wa kesi hiyo nao watawajibika kufika mahakamani kwa ajili ya kutoa ushahidi katika siku itakayopangwa baada ya kutolewa mamauzi ya hoja ya msingi.

Katika shauri hilo, mshatkiwa Ivan Kode ameshtakiwa kwa kosa la shambulio la kuumiza mwili, kinyume na kifungu cha 247 sheria namba 6 ya 2004, sheria za Zanzibar, ikidaiwa aliwashambulia watu wanne kwa kuwapiga bastola yenye risasi za chubwi na kuwasababishia maumivu.