.jpg)
.JPG)
.jpg)
HOTUBA YA RAIS WA
ZANZIBAR NA MWENYEKITI WA BARAZA
LA MAPINDUZI, MHE.
AL HAJJ DK. ALI MOHAMED SHEIN,
KATIKA BARAZA LA IDD
EL HAJJ, 12 SEPTEMBA, 2016
SAWA NA MWEZI 10
MFUNGUO TATU, 1437 HIJRIA
BISMILLAH
RAHMAN RAHIM
Sifa
njema na shukurani za viumbe wote ni zake Yeye Mwenyezi Mungu Mtukufu anaevimiliki
vyote, vilivyomo katika Mbingu na Ardhi.
Ni Yeye peke yake mwenye uwezo wa kuwaongoa waja wake kuwa wacha Mungu
na watiifu wa maamrisho Yake na kujiepusha na makatazo Yake. Tunamuomba Mola wetu Subhanahu Wataala kwa
utukufu wa siku hii, atujaalie sote tuongoke kwa kuyatekeleza maamrisho Yake na
kujiepusha na makatazo Yake. Tunamuomba
atupe nguvu ya kufanya mambo ya kheri na Ucha Mungu hadi mwisho wa uhai wetu
ili tupate mafanikio hapa duniani na kesho mbele ya haki.
Rehma
na amani zimshukie Mtume wetu, Sayyidna
Muhammad (S.A.W), aliyeletwa kuwa ni Nuru na Rehema kwetu sisi Walimwengu. Tunamuomba Mwenyezi Mungu Mtukufu atujaaliye
kuwa wafuasi wake wema na wenye kuyazingatia na kuyafuata mafundisho yake. Tunawaombea rehma na maghfira wazee, ndugu,
jamaa na wenzetu wote waliokwishatangulia mbele ya haki. Tunamuomba Mola wetu
awape shifaa wagonjwa wetu wote na awaondolee mtihani wa maradhi yanayowasibu,
Amin!
Mheshimiwa Balozi
Seif Ali Iddi,
Makamo wa Pili wa
Rais,
Mheshimiwa Zubeir
Ali Maulid;
Spika wa Baraza la
Wawakilishi,
Mheshimiwa Omar
Othman Makungu;
Jaji Mkuu wa
Zanzibar,
Mheshimiwa Sheikh
Khamis Haji Khamis;
Kadhi Mkuu wa
Zanzibar,
Waheshimiwa Mawaziri
na Manaibu Mawaziri,
Waheshimiwa Wakuu wa
Mikoa na Wakuu wa Wilaya,
Katibu Mkuu Kiongozi
na Katibu wa Baraza la Mapinduzi,
Viongozi mbali mbali
wa Serikali,
Viongozi wa Vyama
vya Siasa,
Wageni Waalikwa,
Ndugu Wananchi,
Mabibi na Mabwana,
Assalamu
Aleikum Warahmatullahi Wabarakatuh
IDDI
MUBARAK!
Baada
ya kumtakasa na kumtukuza Mola wetu, Subhanahu Wataala, na kumtakia rehma na
amani, mbora wa viumbe aliyeletwa kwa Waja ili awe kigezo chema; Mtume Muhammad
(S.A.W), tuna wajibu mkubwa wa kumshukuru Mwenyezi Mungu; Mtukufu kwa
kutujaalia neema ya uhai na uzima tukaweza kuifikia siku hii ya sikukuu ya Idd
el Hajj. Kwa hakika, hii ni neema kubwa
aliyoturuzuku Mola wetu hivi leo, ambapo Waislamu tuliweza kusali Sala ya Idd
kwa amani katika maeneo mbali mbali wakati wa asubuhi na hivi sasa baadhi yetu
tumejumuika katika viwanja hivi vya Skuli mpya ya Mkanyageni kwa ajili ya
Baraza la Idd. Kwa furaha kubwa, natoa
mkono wa Idd kwenu nyote mliohudhuria Baraza hili, kwa wenzetu wanaotufuatilia
kupitia vyombo vya habari na kwa Waislamu na Wananchi wote.
Namuomba
Mwenyezi Mungu aijalie siku hii iwe ya furaha na salama kwa kila mmoja wetu. Atujaalie sote tuwe wenye kunufaika na baraka
za sikukuu hii. Mwenyezi Mungu atuwezeshe kuwa ni wenye
kudumu katika kumshukuru kwa neema
anazoturuzuku,
ili atuzidishie neema hizo kama alivyotuahidi katika aya ya 7 ya Surat Ibrahim
yenye tafsiri isemayo:
Na
(kumbukeni) alipotangaza Mola wenu (kuwa) “Kama mkinishukuru, nitakuzidishieni,
na kama mkinikufuru (jueni) kuwa adhabu Yangu ni kali sana”
Mwenyezi
Mungu atulinde na adhabu zake na tuendelee kumshukuru ili atupe kheri na neema zaidi. Atujaalie
kuzitumia katika kuyatekeleza mambo anayoyaridhia ili tupate mafanikio hapa duniani
na huko Akhera twendako.
Ndugu
Wananchi,
Tunamshukuru
Mwenyezi Mungu Mtukufu kwa kutujalia kuwa leo ni siku ya sikukuu, ambapo
wananchi wa Zanzibar na Jamhuri ya Muungano wa Tanzania kwa jumla, tunaungana
na Waislamu wenzetu wa nchi mbali mbali katika kuisherekea siku hii tukufu. Mwenyezi Mungu ametujaalia neema ya sikukuu
hii ya Idd-el-Adha; yaani sikukuu ya kuchinja baada ya Waislamu wenzetu kwa
maelfu kuikamilisha ibada ya Hijja katika mji Mtukufu wa Makka na kuishi japo
kwa siku chache katika maeneo mashuhuri ya Saudi Arabia alikozaliwa Mtume wetu
Muhammad (S.A.W).
Tunamuomba
Mola wetu, Subhanahu Wataala, awajaalie Mahujaji wetu, Hijja njema na azikubali
ibada zao zote walizozifanya, wakiwa wageni wa Mwenyezi Mungu katika maeneo
matukufu. Imepokewa kutoka kwa Sayyidna
Anas bin Malik (RA), kwamba Mtume Muhammad (S.A.W) amesema, mwenye kufanya
Hijja na mwenye kufanya Umra ni mgeni wa Mwenyezi Mungu Mtukufu. Mtu huyo hupewa anachoomba na hurudishiwa
alivyovitowa kwa ajili ya kufanya ibada na huzidishiwa. Mwenyezi Mungu awajaalie Mahujaji wetu wote
wawe ni wenye kunufaika na ukarimu huo wa Mola wetu na awajaalie wadumu katika
kuyatekeleza mafunzo waliyoyapata katika kipindi chote cha ibada ya Hijja na
waendelee kuyatumia katika maisha yao ya kila siku.
Ndugu
Wananchi,
Hatua
ya Waislamu wenzetu kuitikia wito wa Mwenyezi Mungu kwenda kuizuru nyumba ya
Mwenyezi Mungu (Al-Kaaba) kwa kufanya ibada, ni kuitimiza nguzo ya tano ya
Uislamu. Vile vile, hatua ya kushiriki
katika mkusanyiko mkubwa wa Waislamu wa
kila mwaka huko Saudi Arabia, ni kielelezo cha umoja wa waislamu duniani, kwa
lengo moja tu, la kumwabudu Mwenyezi Mungu mmoja na kujiepusha kufanya vitendo
vinavyomchukiza,
ili
kuepuka adhabu Zake kama anavyotubainishia katika aya ya 52 ya Suratul Muumin
katika tafsiri inayosema;
“Na
kwa yakini huu umma wenu ni umma mmoja, na mimi ni Mola wenu, basi niogopeni.”
Kadhalika,
katika kutudhihirishia udugu tulionao waja wa Mwenyezi Mungu, Mola wetu Mtukufu
ametwambia katika Qurani kwenye aya ya 10 ya Surat Al-Hujurat yenye tafsiri
isemayo:
“Kwa
hakika Waumini wote ni ndugu (imani imeunganisha nyoyo zao); basi wapatanisheni
ndugu zenu na mumche Mwenyezi Mungu ili akupeni rehema”.
Ndugu
Wananchi,
Mwenyezi
Mungu ni mwenye uwezo wa kutambua udhaifu wa Wanadamu katika kukabiliana na
mitihani inayoweza kusababisha mgawanyiko miongoni mwetu kwa sababu mbali
mbali. Katika aya mbali mbali za Qurani,
Mwenyezi Mungu ametuasa kuacha kuendekeza tofauti zetu kwa kuwa sote ni ndugu
na katu tusifarikiane na kuacha kuifuata njia Yake ya kheri na salama ili
tuweze kufanikiwa hapa Duniani na Akhera twendako.
Kwa
hivyo, miongoni mwa mafunzo muhimu ya kuzingatia katika sikukuu hii ya
Idd-el-Hajj ni kuibaini hali ya umoja na udugu wa Waislamu wote duniani katika
mkusanyiko mkubwa kwenye uwanja wa Arafa.
Kwa upande wetu tulioko katika maeneo mengine duniani, na sisi nyoyo
zetu zinaungana na wenzetu hao katika kuuadhimisha mkusanyiko huo mkubwa wa
kila mwaka.
Ndugu
Wananchi,
Tuna
wajibu wa kumuomba Mwenyezi Mungu, aujaalie mkusanyiko huo wa Waislamu katika
mji Mtukufu wa Makka, wanaotoka kwenye Mataifa mbali mbali na watu wenye rangi,
hadhi mbali mbali, wanaofuata madhehebu tofauti na wanaozungumza lugha mbalimbali,
iwe ni sababu ya kuleta umoja na amani duniani.
Msingi mkubwa wa dini yetu ni umoja na amani, lakini hivi sasa
tunaendelea kushuhudia mifarakano miongoni mwa Waislamu hali ambayo inaweza kusababisha
kuvunjika kwa amani na kupelekea uharibifu mkubwa wa mali za watu, za Serikali na
hata watu wanaweza kupoteza maisha yao.
Kadhalika,
hali ya kuwepo kwa mizozo na mivutano kwa baadhi ya Masheikh na Waumini inayotokana
na misimamo yao, nayo inaweza kusababisha mifarakano katika jamii yetu. Kwa nyakati
tofauti
tumeweza kuyashuhudia mambo haya hapa
nchini kwa baadhi ya Masheikh na Maimamu wa misikiti wakisusiwa kufanya ibada kwa
visingizio mbali mbali. Mambo haya
yanatokea miongoni mwa watu ambao kabla ya hapo tulikuwa wamoja katika ibada
zetu na shughuli za kijamii, lakini imefika hadi leo tunahasimiana, tunanuniana,
tunaharibiana mazao na mifugo yetu na tunadiriki hata kuchomeana moto makaazi
yetu. Sote tunafahamu kwamba haya yametokea hivi karibuni katika kisiwa hiki
cha Pemba katika Mikoa yote miwili. Sina haja ya kuzitaja sehemu yalikofanywa
mambo hayo ya aibu na yenye kufedhehesha katika jamii yetu. Mambo hayo yamemtia simanzi na kumuhuzunisha
kila mmoja wetu. Mwenyezi Mungu
atuepushe na kufanyiana mambo maovu ya namna hiyo.
Ndugu
Wananchi,
Mambo
hayo ni kinyume na mafundisho ya Mwenyezi Mungu katika Qurani ambao ndio
muongozo wetu pamoja na Hadithi za Bwana Mtume (S.A.W). Uislamu unatuhimiza
umoja, mapenzi na ucha Mungu na kuacha kufarikiana kwani hivyo ni vitendo vya
kishetani ambae amelaaniwa na Mwenyezi Mungu.
Sote tuvilaani vitendo vya aina hiyo na tukumbuke kuwa sisi ni wamoja na
hatupaswi kuhasimiana kwa kufikia kiwango hicho. Tunapaswa
tujitahidi
kufanyiana mambo mema yenye kheri, kwani tukifanya hivyo, ni ibada na ina malipo mema mbele ya Mwenyezi
Mungu.
Katika
hadithi iliyopokelewa na Twabraaniy, Mtume (S.A.W) amesema:
“Amali
ipendezayo zaidi mbele ya Mwenyezi Mungu baada ya zile za faradhi, ni
kumfurahisha Muislamu.”
Kwa
hivyo, wajibu wetu ni kukimbilia kuyafanya mambo ya kheri yanayoiendeleza
jamii, kuwafanyia watu mambo ya kuwafurahisha na kuyazingatia mafundisho ya
dini, maadili mema, utamaduni na malezi tuliyoachiwa na wazee wetu. Hayo ndiyo mambo ambayo tunayopaswa
kuwarithisha watoto wetu na wale watakaokuja baada yetu. Mafunzo ya dini yanatukataza kufanya mambo
maovu lakini mafunzo hayo kwa upande mwengine yanatufundisha tushirikiane
katika kheri na ucha Mungu. Aya ya 2 ya
Surat Al-Maidah inabainisha amri hiyo ya Mola wetu kwa kusema:
“Na
saidianeni katika wema na ucha Mungu.
Wala msisaidiane katika dhambi na uadui.
Na mcheni Mwenyezi Mungu; hakika Mwenyezi Mungu ni mkali wa kuadhibu”.
Tunamuomba
Mwenyezi Mungu atuongoze katika kuyatekeleza mambo ya kheri na atuepushe mbali
na adhabu zake.
Ndugu
Wananchi,
Mafunzo
mengine tunayoyapata kutokana na ibada ya Hijja waliyoitekeleza Waislamu
wenzetu katika mji Mtukufu wa Makka, ni utii wa maamrisho ya Mola wetu kwa
kuzitumia vyema neema alizoturuzuku zikiwemo uhai, afya na mali kwa kutafuta
radhi zake. Hili ni jambo la msingi la
kulizingatia na kumuomba Mwenyezi Mungu atuwezeshe, kwani kutokana na udhaifu
wa kibinadamu, baadhi yetu huwa tunaghafilika. Uhai, uzima wa afya na kuwa na mali huweza
kuwajengea watu kiburi na mtu akajikuta anasahau lengo la kuumbwa kwetu na
kuletwa duniani na la kumuabudu Mwenyezi Mungu, kama Anavyotukumbusha katika
aya ya 56 ya Suratu -Dhaariyat isemayo:
“ Sikuwaumba majini na watu ila wapate
kuniabudu”.
Tunapaswa
kila wakati tujitathmini katika vitendo vyetu tunavyovifanya kama vinakubaliana
na lengo la kuumbwa na kuletwa kwetu duniani.
Haifai kufanya na kushabikia mambo mabaya kwani hayana hatima
njema. Kila mmoja wetu ana jukumu la kuhakikisha
kwamba vitendo viovu havitokei. Mtume
(S.A.W)
ametubainishia wazi wajibu wetu huo katika Hadithi iliyopokelewa na Bukhari na
Muslim kwa kusema:
“Nyote
ni wasimamizi, na kila mmoja wenu atasailiwa kuhusu namna alivyotekeleza
usimamizi wake”
Tumuombe
Mwenyezi Mungu atuwafikishe katika utekelezaji mzuri wa majukumu yetu katika
njia anayoiridhia. Atupe nguvu za
kuzimudu nafsi zetu katika kuvishinda vitendo viovu.
Ndugu
Wananchi,
Mbali
na utii waliouonesha ndugu zetu katika kuitikia wito wa Mola wetu na
kuitekeleza amri ya kwenda kuhiji, mafunzo mengine ya utii kwa Mwenyezi Mungu,
yanapatikana kwenye kisa cha Nabii Ibrahim (A.S.) aliporidhia amri ya Mola wake
ya kumchinja mwanawe wa pekee; Nabii Ismail.
Kisa
hiki kinatufunza utii wa dhati waliokuwa nao wawili hao kwa kuridhia amri ya Mola wao bila ya kusita kwa mategemeo
ya kupata fadhila za Mwenyezi Mungu.
Kutokana na kufuzu kwao, Mwenyezi Mungu ndipo kwa kudura yake akawateremshia
kondoo ili Sayyidna Ibrahim amchinje badala ya mwanawe Sayyidna Ismail. Kwa
hivyo, ikasuniwa kumchinja mnyama katika
siku hii. Kuchinja mnyama na kugawa
nyama yake kwa marafiki na wahitaji wengine ni suna muhimu tunayopaswa
kuitekeleza katika sikukuu hii ya Idd el Hajj kama alivyokuwa akifanya Mtume Muhammad
(S.A.W) na Sahaba zake.
Ndugu
Wananchi,
Utii
ni kigezo muhimu cha ukamilifu wa imani.
Mwenyezi Mungu ametuamrisha tuwe na utii Kwake na kwa Mtume wake pamoja
na kwa wenye mamlaka juu yetu. Hayo
yameelezwa katika aya ya 59 ya Surat An-nisa yenye tafsiri inayosema:
“Enyi
mlioamini! Mtiini Mwenyezi Mungu na mtiini Mtume na wenye mamlaka juu
yenu. Na mkihitilafiana katika jambo
lolote basi lirudisheni kwa Mwenyezi Mungu na Mtume, ikiwa mnamwamini Mwenyezi
Mungu na Siku ya Mwisho. Hayo ndiyo bora
zaidi na ndiyo yenye mwisho mwema”.
Kwa
upande wa kijamii, utii ni kielelezo cha ustaraabu na msingi muhimu wa
kuyaendeleza maadili mema katika jamii.
Aidha, utii wa sheria ni muhimu sana katika kudumisha amani, kuimarisha
mshikamano na kuchangia katika kuleta maendeleo ya nchi. Kutokutii sheria kunasababisha kuongezeka kwa
vitendo viovu na makosa mbali mbali ya uhalifu ambayo yanaweza kuwa chanzo
cha
kuvunjika kwa amani na kuzikwamisha jitihada zetu za kujiletea maendeleo. Kwa hivyo, kila mmoja wetu ana wajibu wa
kuuona umuhimu wa kutii sheria bila ya shuruti, kwani nchi yetu inatawaliwa kwa
misingi ya sheria na hakuna hata mtu mmoja au kikundi cha watu kilicho juu ya
sheria.
Ndugu
Wananchi,
Kwa
nyakati mbali mbali nimekuwa nikisema kuwa ni wajibu wa Serikali kuhakikisha
usalama na hali nzuri kwa wananchi.
Nililisema hilo katika Baraza la Idd el Fitri la mwaka huu kwenye ukumbi
wa zamani wa Baraza la Wawakilishi Kikwajuni na kukinukuu kifungu cha 9 (2) (b)
cha Katiba ya Zanzibar ya mwaka 1984.
Kutokana na kuendelea kujitokeza kwa vitendo vinavyoashiria kutaka
kukwamisha jitihada za Serikali za kusimamia usalama na hali nzuri ya wananchi
wetu, leo napenda nisisitize kwamba Serikali imesimama imara na haina mzaha
katika suala la kusimamia amani na usalama wa wananchi na mali zao pamoja na
wageni wanaoitembelea nchi yetu.
Napenda
nimpongeze kwa dhati Rais wa Jamhuri ya Muungano wa Tanzania; Mheshimiwa Dk.
John Pombe Joseph Magufuli kwa kusisitiza umuhimu wa kutunza amani nchini
katika hotuba zake,
wakati
wa ziara yake aliyoifanya Pemba na Unguja hapo tarehe 2 na 3 Septemba 2016.
Naungana naye katika kuvipongeza vyombo vyetu vya ulinzi na usalama vya Serikali
ya Jamhuri ya Muungano wa Tanzania, Idara
Maalum za Serikali ya Mapinduzi ya Zanzibar
kwa kazi nzuri wanayoifanya katika kuhakikisha amani na utulivu
vinaendelea kuwepo.
Kila
mmoja wetu ana wajibu wa kuhakikisha kwamba watu wote wanaishi kwa amani na
utulivu na wanapata fursa ya kufanya kazi na kwenda kutafuta riziki bila ya
hofu. Kadhalika, kuwepo kwa amani
kutatuwezesha kupata wasaa mzuri wa kufanya vyema ibada zetu mbalimbali na
kupata utulivu wa nafsi. Nawaomba viongozi
wa dini waendelee kutukumbusha na kutuhimiza kila mara kwani ukumbusho huwafaa
walioamini. Mwenyezi Mungu atujaalie
sote tuwe miongoni mwao.
Vile
vile, kuwepo kwa amani na utulivu nchini, kunaiwezesha Serikali kupata fursa
nzuri ya kusimamia na kutekeleza kwa ufanisi mipango mbali mbali ya maendeleo
tuliyojipangia kwa lengo la kukuza uchumi na kuongeza Pato la Serikali.
Hivi
sasa tayari Wizara zote kumi na tatu (13) nilizoziunda mara hii, zimeshaandaa programu ya utekelezaji wa Ilani ya CCM ya Uchaguzi
Mkuu ya mwaka 2015-2020. Napenda nikuhakikishieni kuwa tumeanza vizuri katika
kipindi hiki cha pili na tunategemea kupiga hatua kubwa zaidi za maendeleo. Wajibu wa wananchi wote ni kuziunga mkono
jitihada za Serikali katika kuyafikia malengo yetu. Mafanikio ya utekelezaji wa mipango ya
Serikali yanategemea sana namna wananchi wanavyoshirikiana na Serikali yao, kwa
kujituma katika kufanya kazi zao na kusimamia kwa nguvu zote amani na utulivu.
Ndugu
Wananchi,
Ushirikiano
baina yetu una mchango mkubwa katika kuufanikisha utekelezaji mzuri wa mipango
tuliyojiwekea katika kuinua uchumi wa nchi yetu, kuimarisha miundombinu ya
uchumi na kuongoza upatikanaji wa huduma bora za jamii. Kila mmoja wetu anaziona hatua kubwa za
maendeleo tulizozifikia nchini katika Mikoa yote. Haya ni matunda ya ushirikiano kati ya
Wananchi na Serikali yenu katika utekelezaji wa mipango ya maendeleo
tunayojiwekea. Wahenga wanasema “Mwenye macho haambiwi tazama”. Napenda nikupongezeni sana wananchi wa Mkoa
wa Kusini Pemba kwa hatua mliyofikia ya mafanikio katika sekta zote. Hongereni sana.
Hivi
sasa hali ya upatikanaji wa huduma za maji safi na salama katika Mkoa huu
imefikia asilimia 80. Makisio ya
mahitaji ya maji kwa watu 228,350 wa miji ya Chake Chake na Mkoani na vijiji
vya Mkoa huu ni lita 24,150,285 kwa siku.
Uzalishaji halisi kwa sasa ni lita 22,525,944 kwa siku sawa na upungufu
wa lita 3,923,466. Tuna matarajio
makubwa ya kuongeza kiwango cha sasa kutokana na maendeleo ya utekelezaji wa
miradi mikubwa ya maji tunayoendelea kuitekeleza mijini na vijijini.
Lengo
la Serikali ya Mapinduzi ya Zanzibar ni kuimarisha hali ya upatikanaji wa
huduma za maji safi na salama kutoka asilimia 70 mwaka 2015 hadi kufikia
asilimia 85 mwaka 2020 katika vijiji na katika miji kutoka asilimia 87 mwaka
2015 hadi kufikia asilimia 97 ifikapo mwaka 2020. Tunamuomba Mwenyezi Mungu atuwezeshe
kulifikia lengo hilo.
Ndugu
Wananchi,
Ni
jambo la faraja na tumshukuru Mwenyezi Mungu kutokana na mafanikio tunayoendelea
kuyapata katika huduma za afya ndani ya Mkoa wa
Kusini Pemba wenye
jumla ya vituo
vya afya 27,
hospitali
kubwa mbili ya Abdalla Mzee na Chake Chake na hospitali ndogo moja ya
Vitongoji. Kwa lengo la kuzidi
kufanikisha upatikanaji wa huduma za afya, Serikali inakamilisha kazi za ujenzi
wa kituo kipya cha afya cha Vikunguni na Ndagoni kwa Wilaya ya Chake Chake na
Michenzani na Tasini, Mkanyageni kwa Wilaya ya Mkoani. Aidha, tunakamilisha ujenzi wa Hospitali ya
Abdalla Mzee Mkoani ambayo inatarajiwa kufunguliwa baada ya muda si mrefu panapo
majaaliwa. Azma ya Serikali ni kuzidi
kuziimarisha huduma za afya zinazotolewa katika hospitali na vituo vyote vya
afya kwa kuongeza madaktari, wataalamu mbali mbali na wahudumu wengine wa sekta
ya afya, kuimarisha upatikanaji wa dawa muhimu na kuziimarisha huduma za
maradhi mbali mbali, ili kuondokana na usumbufu wa kuzifuata huduma hizo katika
maeneo ya mbali au nje ya kisiwa cha Pemba.
Ndugu
Wananchi,
Mkoa
wa Kusini Pemba umepiga hatua nzuri ya miundombinu ya barabara ambapo vijiji
vingi vya Mkoa huu vinaweza kufikika kwa kipindi chote cha mwaka kutokana na
kuwa na barabara za lami na zile zilizojengwa kwa kiwango cha kifusi. Kazi ya matengenezo ya barabara katika Mkoa
huu inaendelea ambapo hivi sasa Serikali
inaifanyia matengenezo barabara ya Mgagadu
hadi
Kiwani (km 7.6) na barabara ya Ole hadi Kengeja (km 35). Vile vile, ujenzi wa
barabara ya Mkanyageni-Jundamiti, kupitia Tasini hadi Kangani umekamilika; kwa
kiwango cha kifusi pamoja na ujenzi wa daraja.
Wito
wangu kwenu wananchi, muendelee kuwa na subira, wakati ujenzi wa barabara hizi
ambazo zina mchango muhimu kwa maendeleo ya wananchi na upatikanaji wa huduma
za kiuchumi na kijamii ukiendelea.
Serikali itajitahidi kuhakikisha kwamba inatoa msukumo ili kuona kuwa
ujenzi wake unakamilika kwa haraka kama ilivyokusudiwa. Kadhalika, wananchi hasa wale wanaoishi
katika maeneo zilimopita barabara hizo washirikiane na wakandarasi wetu kuvilinda
vifaa na kuzuwia uharibifu wowote dhidi ya miundombinu hii ambayo imegharimu
fedha nyingi.
Ndugu
Wananchi,
Sherehe
za Idd el Hajj tunazifanya katika msimu wa mavuno ya karafuu, msimu ambao
ulianza mwezi Julai na utamalizika mwezi Oktoba, 2016. Makisio ya mavuno ya mwaka 2015/2016 yalikua
ni tani 3,685 kwa mapitio ya awali. Hata
hivyo, baada ya kupitia mara ya pili hali ya mazao imebainika kupungua ambapo
sasa tuna matarajio ya kupatikana tani 2,810 za karafuu.
Tunamshukuru Mwenyezi Mungu kwa kutujaalia neema hii ambapo hapa katika
kisiwa cha Pemba hadi kufikia tarehe 8 Septemba, 2016 vituo vyetu vya ZSTC
vimeweza kununua tani 1,345.5 zenye thamani ya TZS Bilioni 18.8 Hii ni sawa na asilimia 47.9 ya makisio.
Napenda
kuwapongeza sana wakulima wa karafuu kwa kuendelea kuuza karafuu zao katika
vituo vya Shirika la Biashara la Taifa na kuzitumia vyema fursa zinazotolewa na
Serikali kupitia Shirika hilo. Serikali
itaendelea kuwapatia wakulima bei nzuri, mikopo, vifaa na miche ya mikarafuu
pamoja na kuziimarisha huduma katika vituo vya kununulia karafuu ili lengo la
kulikuza na kuliendeleza zao hili muhimu kwa uchumi liweze kufanikiwa. Kadhalika, nawasihi wananchi wote kuendelea
kushirikiana na Serikali katika kukabiliana na magendo ya karafuu ili faida ya
zao hili iweze kutunufaisha sote. Jitihada mnazozifanya za kuisaidia Serikali
katika kupambana na wafanya magendo ziendelezeni, kwani zinatusaidia sote.
Ndugu
Wananchi,
Leo
ni siku ya furaha kwa hivyo sitopenda nikuchosheni kwa hotuba ndefu. Hata hivyo, nasaha zangu ni kuwa tunaendelea kuyatumia
mafunzo ya ibada ya Hijja katika maisha yetu ya kila
siku.
Tusherehekee Sikukuu hii kwa amani, kutembeleana, tuombeane dua, tuwaombee wazee
wetu, ndugu na jamaa zetu waliotangulia mbele haki na vile vile, tuwaombee dua waislamu wenzetu walioko katika mji mtukufu wa
Makka ambao tunaungana nao katika sherehe hizi.
Mwenyezi Mungu awajaalie na wao sikukuu njema na awarudishe nyumbani
salama.
Mafunzo
ya Hadithi za Bwana Mtume (S.A.W) yanatufundisha juu ya kheri kubwa ya
kuidiriki siku ya leo ambayo Mtume (S.A.W) ameeleza kwamba;
“Habakii
yoyote siku ya Arafa mwenye imani (ndogo kama) ya mdudu chungu katika moyo wake
ila Mwenyezi Mungu Anamsamehe. Akauliza mtu,
Hii ni kwa walio Arafa tu ewe Mjumbe wa Mwenyezi Mungu (S.A.W), au kwa
wote? Mtume (S.A.W) akajibu, bali ni kwa watu wote” (Bin Humeyd).
Kwa
hivyo, neema za Siku ya Arafa zinaenezwa kwetu sote ingawa kwa Mahujaji wetu
huwa ni zaidi. Kwa hivyo,
tunapowasiliana nao tusiache kuwakumbusha watuombee dua na waiombee nchi yetu kheri
ili tuzidi kuishi kwa amani, umoja na mshikamano.
Ndugu
Wananchi,
Kabla
sijamaliza hotuba yangu hii, napenda nitoe shukurani maalum kwa taasisi zote
zinazowahudumia mahujaji wetu, waliopata uwezo wa kwenda kuitekeleza Ibada ya
Hijja kama sote tunavyotarajia. Ni vyema
taasisi hizi zikaendelea kutoa huduma zao kwa kuzingatia imani zaidi na
kuwaondelea wananchi usumbufu usio wa lazima.
Kadhalika, taasisi zinazoshughulikia Hijja ziendelee kushirikiana na
Kamisheni ya Wakfu na Mali ya Amana kwa niaba ya Serikali kwani tunawajibu wa
kuhakikisha usalama wa wananchi wetu.
Napenda
nikuhakikishieni kuwa Serikali itaendelea kushirikiana na wahusika wote
wanaoshughulikia masuala ya Hijja ikiwa ni pamoja na kuhakikisha azma yetu ya
kuanzisha Mfuko wa Hijja. Kadhalika, kwa
kutambua kuwa watu wengi hutumia fedha zao za kiinua mgongo kwa ajili kwenda
Hijja, Serikali itaendelea kuhakikisha kuwa wastaafu wanapata fedha zao kwa
wakati. Kwa mfano, katika kipindi cha
Januari hadi Agosti, kwa mwaka huu, Serikali imelipa jumla ya TZS Bilioni 16.2
kwa wastaafu 1,193 kwa ajili ya kiinua mgongo ambapo wastaaafu 90 waliomba fursa
maalum kwa ajili ya kutaka kwenda Hijja na wakapewa kipaumbele. Mwenyezi
Mungu atuwezeshe kufanya vizuri zaidi ya hayo.
Ndugu
Wananchi,
Kama
tunavyoelewa, leo tunasherehekea Sikukuu ya Idd el Hajj katika Mkoa huu wa
Kusini Pemba, ikiwa ni katika kuendeleza utaratibu tuliojiwekea ambapo Waislamu
na wananchi walioko katika Mikoa yetu mbali mbali hupata fursa ya kujumuika
pamoja katika kuisherehekea Sikukuu hii kila mwaka. Mtakumbuka kuwa sherehe kama hizi mwaka jana
tulizifanya katika Mkoa wa Kaskazini Unguja.
Napenda
kuchukua fursa hii kuipongeza Kamati ya Maandalizi kwa kushirikiana na uongozi
wa Mkoa wa Kusini Pemba pamoja na Wilaya zake kwa kuzifanikisha sherehe
hizi. Nakupongezeni kwa dhati na natoa shukurani
kwa Wananchi wote wa Mkoa huu pamoja na Wananchi kutoka maeneo mengine ya Pemba
mliojitokeza kwa wingi katika Baraza hili la Idd na wale tulioshirikiana katika
Sala ya Idd wakati wa asubuhi.
Tunamuomba Mwenyezi Mungu azidi kuziunganisha nyoyo zetu, atupe mapenzi
baina yetu na atuwezeshe kuendelea kushirikiana katika mambo yote ya kheri na
maendeleo katika nchi yetu.
Ndugu
Wananchi,
Namalizia
nasaha zangu kwa kuzidi kuiombea nchi yetu amani na maendeleo zaidi. Mwenyezi Mungu atupe mapenzi na uwezo wa
kudumu katika kufanya mambo ya kheri.
Awajaalie watoto wetu wawe wema, wenye bidii katika masomo yao na
wanaozingatia maadili na malezi mema tuliyoachiwa na wazee wetu. Awaepushe kujiingiza katika vitendo
vinavyoweza kuyaharibu maisha yao, jamii yetu na wawe Wazalendo na raia wema wa
nchi hii. Wale wanaojiandaa na mitihani,
Mwenyezi Mungu awajaalie wafaulu katika mitihani yao yote.
Natoa
shukurani zangu tena kwa wananchi wa Mkoa wa Kusini, Pemba, kwa waandalizi wa
shughuli hii pamoja na nyote mliohudhuria katika Baraza hili. Kadhalika, natoa shukurani kwa vyombo vya
habari na wale wote wanaotufuatilia wakiwa majumbani. Tunamuomba Mwenyezi Mungu aturudishe sote
majumbani kwetu kwa salama na amani.
IDD
MUBARAK
WAKULLU
AAM WA ANTUM BIKHEIR
Ahsanteni
kwa kunisikiliza.
No comments:
Post a Comment