Balozi Seif: UVCCM kataeni kuwa ngazi urais 2015

 Na Othman Khamis, OMPR

MJUMBE wa Kamati Kuu ya Halmashauri Kuu ya Taifa ya CCM, Balozi Seif Ali Iddi amema jumuiya za chama zinaweza kukosa ufanisi kutokana na tabia ya baadhi ya viongozi kudharau wanachama waliokubali kujitolea kuimarisha chama hicho.

Kauli hiyo aliitoa wakati akiufungua mkutano mkuu wa Umoja wa Vijana wa CCM (UVCCM) mikoa miwili ya magharibi na mjini katika ukumbi wa mikutano ofisi ya CCM mkoa Amani mjini Zanzibar.

Balozi Seif ambae pia ni Makamu wa Pili wa Rais alisema ipo tabia chafu iliyojengeka ndani ya chama kwa baadhi ya wanachama kumuepuka mwanachama anayepoteza muda na nguvu zake kwa ajili ya kutetea na kukisimamia chama katika utekelezaji wa sera zake.

Aliwataka wanachama na viongozi hao kuhakikisha wanachagua wanachama wanaoelewa wajibu na dhamana zao katika jumuiya na chama chenyewe.

Alifahamisha kwamba umoja wa vijana pamoja na ule ya wanawake (UWT) zina mkono mkubwa na mrefu ndani ya chama kwa sababu ya nguvu na wingi wao.

Hivyo alisema ni wajibu kwao kuhakikisha wingi na nguvu hizo zinalindwa na kuenziwa ipasavyo.

Aliwatahadharisha vijana kuwa makini katika ulinzi wa chama chao kwa vile zipo dalili zilizoanza kujichomoza za kuvamiwa kwa jumuiya hiyo kwa malengo ya watu wachache wanaoelekeza nguvu zao katika uchaguzi wa urais wa Jamuhuri ya Muungano wa Tanzania wa mwaka 2015.

“Kinacholeta tabu hivi sasa ambacho vijana wameanza kutumiwa kwa nafasi ya urais wa Jamuhuri ya Muungano wa mwaka 2015. Msikubali Jumuiya yenu ikatumiwa kwa maslahi binafsi,” alitahadharisha Balozi Seif.

Aliwataka wanachama wote wenye nia ya kutaka kugombea nafasi hiyo ni vyema wakasubiri wakati utakapowadia na liliopo sasa ni kuendelea kushirikiana na viongozi wenye dhamana hiyo katika kuwaletea maaendeleo wananchi.

Akigusia suala la Muungano,aliwakumbusha vijana kuwa CCM bado inaendelea kutetea sera za serikali mbili ambazo kila mpenda maendeleo ameshuhudia ufanisi uliopatikana.

Alisema wapo baadhi ya watu wanaochukia mfumo huo lakini alisisitiza kwamba wataendelea kuchukia kwa sababu bado unaonekana kupendwa na wananchi pamoja na wanachama ambao ndio waamuzi wakati wa mchakato wa mabadiliko ya katiba ya muungano wa Tanzania.

Akimkaribisha Balozi Seif, Mwenyekiti wa UVCCM mkoa mjini magharibi anayemaliza muda wake, Tauhida Galos Nyimbo aliwaasa vijana kuelewa kwamba kazi yao ni kujitolea wakati wote.

Alisema tabia ya baadhi ya wanachama kujaziwa fomu za uongozi inadhoofisha nguvu za chama kwa vile muda mwingi wa watu hao hutegemea kupata kipato zaidi badala ya kujitolea.