Maalim Seif:Jiandikisheni vitambulisho vya Taifa

Na Hassan Hamad, OMKR

MAKAMU wa Kwanza wa Rais wa Zanzibar, Maalim Seif Sharif Hamad ametoa wito kwa wananchi kujitokeza kwa wingi kujiandikisha vitambulisho vya taifa kunakotarajiwa kuanza Oktoba 10.

Alisema suala la vitambulisho limekuwa na umuhimu wa kipekee duniani katika kutunza kumbukumbu na mipango ya kitaifa, hivyo wananchi wasipuuze kujiandikisha.

“Wananchi tafadhalini musipuuze, nendeni mkajiandikishe ili mpate vitambulisho vya taifa, na nakwambieni mkipuuza mtakujajuta baadae,” alitahadharisha Maalim Seif na kuongeza.

“Hivi sasa tunasikia kuna baadhi ya maeneo wananchi waliokataa kuhesabiwa katika sensa ya watu na makaazi iliyomalizika hivi karibuni nchini kote, hawapatiwi huduma katika maeneo yao, kwa hivyo nakunasihini sana wananchi msipuuze kabisa.”

Maalim Seif ambaye pia ni Katibu Mkuu wa chama cha CUF, alitoa kauli hiyo wakati akizungumza na wanachama wa CUF na wananchi baada ya kufungua tawi la chama hicho jimbo la Magogoni wilaya ya magharibi Unguja.

Aidha Maalim Seif aliwaonya watendaji wanaoendelea kuwahangaisha wananchi wakati wanapoomba kupatiwa vitambulisho vya Mzanzibari Mkaazi kuwa, wanakwenda kinyume na maagizo ya Rais wa Zanzibar Dk. Ali Mohammed Shein, na kwamba watachukuliwa hatua za kisheria kwa kukaidi amri hiyo.

Alisema katika baadhi ya maeneo yakiwemo mikoa ya Pemba pamoja na mkoa wa Kaskazini Unguja, hali ya upatikanaji wa vitambulisho hivyo imekuwa ikienda vizuri lakini tatizo kubwa zaidi limekuwa likijitokeza katika mkoa wa mjini magharibi, jambo ambalo halitofumbiwa macho.

“Vitambulisho hivi ni haki ya kikatiba ya kila Mzanzibari aliyetimiza masharti ya ukaazi, leo anajitokeza sheha anawaambia wananchi kuwa hatoi barua hadi mtu atimize umri wa miaka 50,”, alielezamaalim Seif.

Aliwataka watendaji wa ofisi ya vitambulisho vya Mzanzibari Mkaazi kufanya kazi kwa uadilifu na kuepuka kutumiwa vibaya na viongozi kwa maslahi ya kisiasa.

“Unapomkosesha mwananchi kitambulisho unakusudia nini, huu ni ukiukwaji wa katiba na lazima tuukomeshe,” aliongeza.

Akizungumzia kuhusu nia ya kujiuzulu kwa Naibu Katibu Mkuu wa CUF Zanzibar, Ismail Jussa Ladhu, Maalim Seif amewathibitishia wanachama juu ya ukweli wa jambo hilo, na kuwataka wasifadhaike kwani anafanya hivyo kwa nia njema.

“Jussa bado ni mwanachama kindakindaki wa CUF na ni mjumbe wa baraza kuu la uongozi ndani ya chama chetu, lakini baada ya kutuletea maoni yake tuliona sababu zake ni za msingi na hakuna haja ya kumzuia kutimiza maamuzi yake,” alisema.

Alisema ifikapo Oktoba 10, Jussa atakuwa si Naibu Katibu Mkuu tena wa CUF na kwamba viongozi wanatafakari juu ya kumpata mwanachama atakaekaimu nafasi hiyo.

Ametaja sababu za msingi zilizotolewa na Jussa kutaka kujiuzulu kuwa ni pamoja na kumuwezesha kupata muda wa kutosha kushugulikia maendeleo ya jimbo lake la Mji Mkongwe pamoja na kufanya utafiti kabla ya kuibana serikali katika vikao vya Baraza la Wawakilishi.

Katika Mkutano huo, Maalim Seif alikabidhi baskeli tisa kwa ajili ya makatibu wa matawi ya CUF katika jimbo la Magogoni, kigari kwa ajili ya Ali Khamis Ali pamoja na shilingi 300,000 kwa ajili ya kikundi cha ushirika cha jimbo hilo.