Waziri awaonya wanasheria

Joseph Ngilisho,Arusha

NAIBU Waziri wa Nishati na Madini ,George Simbachawene amewataka wanasheria kuweka maslahi ya taifa mbele wakati wanaposaini mikataba ya uchimbaji wa mafuta na gesi ili nchi pamoja na Watanzania waweze kunufaika na rasilimali hizo.

Hayo yalisema mwishoni mwa wiki jijini Arusha , wakati akifunga mafunzo ya siku tano yaliyoshirikisha wanasheria pamoja na wataalam wa mafuta na gesi juu ya kuangalia mikataba inayoingiwa na watafutaji na wachimbaji mafuta na gesi baharini.

Alisema uchimbaji mafuta ni suala la muda mrefu lakini kwa bahati nzuri gesi ndiyo imeweza kuleta neema zaidi kuliko mafuta ingawa bado watafutaji wa gesi na mafuta wanaendelea kuangalia kama kuna uwezekano wa kupata mafuta pia.

Alisema kutokana na uchimbaji huo wanasheria  ni lazima wakaweka maslahi ya kitaifa mbele ili nchi iweze kunufaika badala ya kujali maslahi yao binafsi ambayo hayaleti tija.

“Wanasheria angalieni maslahi ya Taifa kwanza katika kusaini mikataba msitangulize maslahi yeni binafsi tunataka gesi ikivumbuliwa au mafuta basi nchi inufaike pamoja na wananchi kwa ujumla,” alisema.

Naye mmoja wa washiriki wa mafunzo hayo ambaye ni Kaimu Mkurugenzi wa Utafutaji,Uzalishaji na Huduma za Kiufundi wa Shirika la Petroli Tanzania (TPDC), Elias Kilembo alisema hivi sasa Tanzania imepiga hatua katika ugunduzi wa gesi na mafuta kimataifa hivyo kutokana na takwimu wanazotoa kampuni zinazotafuta mafuta ni lazima zitoe taarifa kwa wataalam ili nao waweze kuzipitia na kuhakikisha katika masuala ya mikataba nchi inafaidika kwa asilimia kubwa.

Alisema katika masuala ya mikataba kuna sheria zake na ni lazima kumvuta mwekezaji na kulinda mapato kwa nchi na mwekezaji hivyo ni muhimu wataalam kuangalia suala hilo kwa makini ili kuondokana na mikataba mibovu inayolalamikiwa na watu.