Wajumbe wa Baraza la wawakilishi watakiwa kuibana Serikali ili kuendeleza uwajibikaji

Na Himid Choko, BLW                              

Katibu wa Baraza la Wawakilishi la Zanzibar Ndugu Yahya Khamis Hamadi amewataka Wajumbe wa Baraza hilo kutimiza wajibu wao wa kikatiba kwa kuidhibiti Serikali  ili kuendeleza uwajibikaji.

Amesema  hatua hiyo itafikiwa  kwa  kuihoji   kuhusiana na sera , mipango maalum ya kibajeti  pamoja na kuiuliza masuala mbali mbali  yanayohusu uendeshaji , utekelezaji na usimamizi wa shughuli zake.

Ndugu Yahaya amesema hayo leo  Wakati akitoa mada kuhusiana na Dhana ya Baraza la Wawakilishi katika kuisimamia serikali   iliyofanyika katika ukumbi wa mikutano wa Baraza hilo Mbweni  kwenye  semina ya siku moja iliyowashirikisha wajumbe wa Baraza hilo.

Amesema  Kanuni za Baraza hilo zimeelekeza wazi  Utaratibu wa Mawaziri kuulizwa  maswali kuhusu jambo lolote la Umma au jambo jengine ambalo linasimamiwa na wizara zao. Amesema Mjumbe pia anaweza kuuliza suala Kwa jambo ambalo Baraza limemteuwa kulishughulikia .

Amesema serikali ya Mapinduzi ya Zanzibar ni serikali ya wananchi, hivyo wananchi hao kupitia wawakilishi wao waliowatuma kuwawakilish   wana haki ya kupata taarifa juu ya mambo yanavyoendeshwa  katika  serikali yao .

Katibu huyo wa Baraza la Wawakilishi amezitaja mbinu nyengine za kuidhibiti serikali kua ni pamoja na utungaji wa Sheria ambazo  itazifuata  katika utendaji wa shughuli  na mwenendo wake.

Amesema  hatua hii ya utungaji wa sheria itasaidia kwa mtu au kikundi chochote  cha watu kuweza kwenda mahakamani  kupinga kitendo au uamuzi uliofanywa na serikali  kinyume na sheria.

Ameongeza kufahamisha kwamba njia nyengine ya kudhibiti  utendaji wa serikali ni uidhinishaji wa Bajeti  kwa sababu idhini ya Baraza inahitajika ili serikali iweze kutumia fedha za wananchi katika kutekeleza mipango yake.

“ Endapo Baraza  halikuridhishwa na mpango fulani  unaokusudiwa kutekelezwa na  serikali au halikuridhika na fedha zilizoombwa kwa ajili ya kutekeleza mpango huo , basi linaweza kuukataa mpango huo “ Alisisitiza  ndugu Yahya.

Hata hivyo Katibu huyo wa Baraza la Wawakiklishi amesema kwa namna Baraza hilo linavyofanya kazi hivi sasa na  bila  ya Wajumbe wake kujidhatiti,  basi serikali itachukua muda kurekebisha baadhi ya Mapungufu yanayoibuliwa na Baraza hilo na kufanyakazi bila ya kusimamiwa.

Amewataka wajumbe hao kufanya kazi zao kwa umakini mkubwa  hasa wanapokua katika Shughuli za Baraza na Kamati zake  ili kulinda hadhi na heshima kubwa ya chombo hicho.

Kwa upande wa wajumbe hao wameelezea wasi wasi  wao mkubwa hasa kwa Utaratibu wa hivi sasa wa kupitisha kwanza Bajeti  ya serikali kuu na kufutiwa na bajeti za kisekta.

 Wamesema Utaratibu huo unawafanya  kukosa nguvu za kuhoji  au kuikataa Bajeti za Kisekta  kwa vike  inakuwa tayari zimeshapitishwa katika bajeti kuu.

Kwa upande wake Waziri wa Nchi, Afisi ya Rais , Ikuli Mheshimiwa Dr. Mwinyi Haji Mwadini amesema Serikali imekuwa  ikichukua hatua mbali  kutokana na  Ripoti au maagizo mbali mbali yayotolewa na Baraza la Wawakilishi.

Akitowa mfano Dr. Mwinyi Haji amesema katika Ripoti ya Baraza la Wawakilishi inayotokana na  Kulichunnguza  Shirika la Umeme la Zanzibar (ZECO ) na Baraza la Manispaa  Serikali  iliwaita wahusika wakuu  na kuwahoji pamoja na kuchukua hatua mbai mbali kwa waliobainika na  na kasoro mbali mbali.

Semina hiyo iliyofunguliwa na Spika wa Baraza la Wawakilishi Mheshimiwa Pandu Ameir Kificho imedhaminiwa na Shirika la Mpango wa Maendeleo la Umoja wa Mataifa UNDP chini ya |mapango wake wa Kusaidia Mabunge na Vyombo vya Kutunga sheria.