JK akerwa na ufaulu mdogo Chemba, Kondoa

Na Fatina Mathias, Dodoma

Rais  Jakaya  Kikwete, ameshangazwa na ufaulu wa chini katika  wilaya za Chemba na Kondoa mkoani Dodoma na kuwataka viongozi kukaa chini na kujiuliza sababu ya kushuka kwa ufaulu huo.

Agizo hilo alilitoa kwa nyakati tofauti akiwa katika ziara  yake ya kikazi mkoa wa Dodoma.

Alisema  kiwango cha ufaulu nchini kimekuwa kikiongezeka lakini wilaya hizo zimeendelea kuwa chini kielimu.

"Mwaka  jana katika wilaya ya Kondoa ufaulu katika darasa la saba ulikuwa asilimia 23 na kwa kidato cha nne ulikuwa asilimia 46 ambapo  katika wilaya ya Chemba  kiwango cha ufaulu ni asilimia 19 wakati lengo  lililopo ni kuinua ufaulu hadi kufikia asilimia 60 ili mwakani wafike kwenye asilimia 80,"alisema.

Kuhusu  migogoro ya mipaka,aliahidi  kukutana na Waziri Mkuu na viongozi wengine wenye dhamana ili waweze kulipatia ufumbuzi wa kudumu kwa kuwa katika ziara yake alipokea vilio vya migogoro hiyo.

Alisema wakati akipita katika kijiji cha Haneti, wananchi walisimamisha msafara wake na kueleza kilio chao cha mgogoro wa mipaka.

Aidha aliiagiza halmashauri ya wilaya ya Chemba m kuhakikisha inatenga ardhi kwa ajili ya Shirika la Nyumba (NHC) ili liweze kujenga nyumba bora kwa ajili ya watumishi.

Alisema  wakiwapa ardhi NHC watawajengea  nyumba bora na hivyo itaondoa visingizio vya watumishi kwenda kukaa wilaya 

nyingine ya Kondoa.

Alisema katika maeneo ambayo NHC wamejenga makazi wamefanya vizuri kwa kuwa yatasaidia pia kuifanya wilaya 

kuonekana na kupangika vizuri.

Aidha alisema hali hiyo itawafanya wafanyakazi wasipate adha ya kupanga nyumba ambazo  mazingira yake hayaridhishi.

Aidha alisema eneo la ujenzi wa hospitali limepatikana na NHC wamekabidhiwa ili waweze kujenga na atawasaidia kulisemea 

suala hilo.

Kwa upande wake, Mbunge wa Kondoa Kusini, Juma Nkamia,  alisifu afanikio yaliyopatikana katika utekelezaji wa ilani ya 

uchaguzi ya CCM na kumpongeza Rais na serikali yake kwa kufanikisha hilo.