Wanaushirika Pemba waomba taaluma zaidi katika ufugaji Majongoo

Na Bakari Mussa, Pemba

Wanaushirika wa Upandaji Mwani wa kikundi cha Jitihada katika Shehia ya Kiungoni Pemba, wameiomba Serikali kupitia Wizara ya Mifugo na Uvuvi , kuwapatia taaluma  na Nyenzo za Ufugaji wa Majongoo na Kaa ili waweze kuongeza kipato chao.

Wakizungumza na mwandishi wa Habari hizi huko Kijijini kwao Kiungoni , walisema kuliko tija wanayoipata kutokana na kuongezeka kwa gharama za Vifaa na bei ndogo wanayouza kwa wanunuzi.

Wanaushirika hao walieleza kuwa ni wameamuwa kujiajiri kupitia Kikundi chao kwa kutekeleza Miradi mbali mbali kama vile Uvuvi ambao walipata msaada wa Vifaa kupitia MACEMP, lakini kwa sasa Vifaa hivyo havitoshi kutokana na mahitaji ya Wanakikundi.

Hata hivyo walieleza kuwa wanachohitaji kwa sasa ni kupatiwa Boti yenye uwezo wa kufika mbali ili waweze kupata Samaki wa kutosha kwa vile waliyonayo haina uwezo wa kufika masafa ya mbali wakati masafa ya karibu kila mmoja anavua.

Wanaushirika hao walisema kuwa iwapo watapatiwa miradi mbadala , wanaweza  kupiga hatuwa kubwa katika kupiga vita Umaskini wa kipato.

Walieleza kuwa ni vyema bei ya Mwani iliopo sasa ikaongezwa kutoka Tsh,400/= hadi 1000/= kwa kilo ,kwani kazi ni kubwa na Vifaa wananunuwa wenyewe.

Hivyo walisema  kuwa wamekuwa na mafanikio kiasi fulani kwani wameweza kutumia fedha wanazozipata katika miradi yao kuwaendeleza kimaisha na kuepukana na utegemezi hasa kwa akinamama.