Super Falcon kuanza ligi na Chipukizi . Mafunzo, KMKM kufungua dimba Amaan

Na Haroub Hussein

MABINGWA watetezi wa ligi kuu ya soka Zanzibar timu ya Super Falcon, wataanza kampeni za kulibakisha taji lao kwa kupambana na Chipukizi katika uwanja wa Gombani.

Katika ligi kuu msimu ujao inayotarajiwa kuanza Septemba 8 chini ya udhamini wa kinywaji cha Grand Malt, makamu bingwa Jamhuri atakuwa na kibarua dhidi ya wanamaji wa KMKM katika uwanja wa Amaan.

Kwa mujibu wa ratiba iliyotolewa na Chama cha Soka Zanzibar (ZFA), Jumapili ya Septemba 9, masarahange wa Malindi na wavuta nanga wa Bandari, watatiana mikononi uwanja wa Amaan, huku wajenga uchumi wa Duma, wakivutana na Jamhuri huko Gombani Pemba.

Septemba 10 kutakuwa na mchezo mmoja tu, ambapo nyasi za Amaan zitakuwa mashakani kuhimili madaluga ya timu za Mtende na Zimamoto, na mzunguko wa kwanza utamalizika Septemba 11 kwa mechi kati ya Mundu na Chuoni.

Mechi zote hizo zimepangwa kuanza wakati wa saa kumi.

Ligi hiyo itakuwa mapumzikoni kwa siku tatu, ikitarajiwa kurudi viwanjani Septemba 15, kwa mechi kati ya KMKM na Malindi uwanja wa Amaan, na Super Falcon na Duma, katika dimba la Gombani.