Zenj mwenyeji mkutano wa michezo ya magari Afrika

Na Salum Vuai, Maelezo
NAIBU Waziri wa Mawasiliano na Miundombinu Issa Haji Ussi, kesho anatarajiwa kufunga mkutano wa Shirikisho la Mashindano ya Magari barani Afrika (AAT), utakaofanyika katika hoteli ya Blue Bay iliyoko Kiwengwa Wilaya ya Kaskazini B.

Mkutano huo wa mwaka umeandaliwa kwa ushirikiano na shirikisho kama hilo la dunia (FIA), pamoja na Baraza la Afrika la michezo ya vyombo vya moto na utalii (ACTA).

Mratibu wa mkutano huo hapa Zanzibar Mussa Tharia, amezitaja nchi hizo kuwa ni Kenya, Uganda, Tanzania, Botswana, Afrika Kusini, Nigeria, Msumbiji, Zimbabwe, Malawi na Zambia.

Tharia amesema, mkutano huo pia utahudhuriwa na Makamu wa Rais wa Baraza la Michezo ya Vyombo vya Moto wa dunia, ambaye pia ni Rais wa klabu ya michezo hiyo ya Falme za Kiarabu (UAE), Dk. Mohammed Ben Sulayem, atakaeuongoza ujumbe wa watu sita.

Mratibu huyo amesema, mkutano huo hauna lengo la kuyarejesha mashindano ya magari hapa Zanzibar, lakini umevutiwa na mandhari ya kisiwa hichi chenye vivutio vya kitalii ambapo alisema ujio wa wajumbe wake, unakadiriwa kuingiza takriban dola 40,000 (62,800,000 Tshs).

Hata hivyo, alisema kuna michezo tafauti inayohusisha magari ambapo kunakuwa na viwanja maalumu vilivyojengewa uzio, na wachezaji huzunguka na kuonesha umahiri wa kuendesha huku watazamaji wakiwa majukwaani katika hali ya usalama.

“Kama itaona iko haja, Zanzibar inaweza kuanzisha michezo kama hiyo ambayo huchezwa katika mazingira salama”, alieleza Tharia ambaye ni Katibu wa klabu ya mashindano ya magari hapa Zanzibar, ambayo alisema bado haijafa.

Kimsingi, alisema mktano huo utajadili njia bora za uendeshaji salama wa magari unaolenga kupunguza ajali na majanga yatokanayo na vyombo vya moto iwe michezoni au katika safari za kawaida.

Miongoni mwa wajumbe watakaohudhuria mkutano huo wa mwaka, ni Rais wa FIA kanda nambari moja, Werner Kraus, Mkurugenzi Mwendeshaji na Rais wa Afrika David Njoroge, na Katibu Nizar Jivani kutoka Tanzania, ambaye ni Rais wa AA Tanzania, pamoja na Kamishna wa Polisi Zanzibar, Mussa Ali Mussa.

Zanzibar iliwahi kuandaa mashindano ya magari Tanzania kwa mara ya kwanza mwaka 2005 ambayo yalimalizika salama, na baadae mwaka 2006 na 2007, ambapo kwa bahati mbaya kulitokezea ajali zilizosababisha vifo vya  madereva Nasir Khan (2006) na Khalid Bakhresa (2007).

Kufuatia matukio hayo, Serikali ya Zanzibar ilitangaza kuyasitisha hadi muda usiojulikana.