Makamu wa Kwanza wa Rais wa Zanzibar Mhe. Othman Masoud Azungumza na Wajasiriamali wa Sokoni

 

Makamu wa Kwanza wa Rais wa Zanzibar Mhe. Othman Masoud Othman, amesema kwamba serikali italifanyia kazi suala la malalamiko ya wafanyabiashara wa masoko mbali mbali nchini kutolipwa fedha zao na wenye mahoteli ambao wanachukua bidhaa  zao bila kuwalipa kwa muda mrefu.

Mhe. Othman ameyasema hayo ofisini kwake Migombani mjini Zanzibar,  alipokutana na uongozi wa Shirikisho la Umoja wa wafanyabiashara wa Masokoni Zanzibar (SHIMAZA), kujitambulisha na azma yao ya kuendeleza shughuli mbali mbali ikiwemo mashindano ya michezo na usafi wa mazingira kwa maendeleo ya kibiashara kwa wajasiriamali hao.

Hata hivyo,  pamoja na mambo mengine  walilalamikia pia kukosa malipo ya bidhaa zao zinazotumiwa na baadhi ya wenye mahoteli kwa muda mrefu na kuiomba serikali isaidie uwezekano wa kupata malipo yao ili kuendeleza kazi zao za biashara kwenye masoko hayo.

Mhe. Othman amesema kwamba serikali inatambua kuwepo kadhia hiyo, kwa vile suala hilo liliwahi kujitokeza mwaka 2012 kwa uongozi wa iliyokuwa hoteli ya Venta Club kushindwa kuwalipa wafanyabiashara wa masoko kwa bidhaa za mboga mboga na matunda walizozitumia.

Amefahamisha kwamba kutokana na kujitokeza hali hiyo  Serikali kupitia Mamlaka ya Ukuzaji na Uendelezaji Vitega Uchumi Zanzibar (ZIPA) iliweka utaratibu  na mfumo maalumu wa kudibiti hali hiyo  isijitokeze tena lakini sasa imejirejea.

Amesema kwamba jitiada zilizofanywa na serikali wakati huo wa mwaka 2012 ilisaidia wafanyabiashara kulipwa fedha zao na kuwekwa msisitizo wa kufuatwa utaratibu na Muongozo wa serikali chini ya usimamizi wa ZIPA .

Hata hivyo, amewataka wafanyabiashara hao  kuondokana na dhana kwamba katika masoko kuwa ni paala pa kuendeleza  kazi za kibiashara pekee  , bali wazingatie kwamba ni sehemu na hospitali ya mwanzo katika kulinda afya ya mwanadamu kwa chakula anachotumia.

Amefaamisha wafanyabiashara wanapaswa kuzingatia usafi wa hali ya juu kwenye bidhaa zao na kuachana na  utamaduni wa mazoea wa kuuza bidhaa kwa kuweka chini pamoja na mazingira yasioridhisha  jambo linaloweza kuhatarisha afya ya mtumiaji na pia kuzishusha thamani bidhaa zao hasa kwa watumiaji wanaotoka nje ya Zanzibar.

Aidha amegusia suala la kufanya shughuli zao kwa kuzingatia mifumo ya kileo ya ufanyaji biashara ambayo inauwezo wa kuongeza thamani biadhaa mbali mbali za matunda na mboga mboga pamoja na kuwepo mbinu za kileo za uhifadhi bidhaa hizo.

Kwa upande wao wafanyabiashara  hao wameomba serikali kuweka mfumo bora wa utoaji wa elimu kwa wajasiri amali mbali mbali waliopo masokoni ikiwa ni pamoja na kuwezeshwa kuzisindika na kuzihifadhi kwa njia za kisasa bidhaa za matunda na mboga mbaga ambazo Zanzibar huwepo kwa wingi katika msimu. 

Wamesema kutokana na hali hiyo ya kukosa elimu na uwezo wa kuifadhi baadhi ya matunda na mboga mboga zimekuwa zikiaribika na kutupwa kwa baadhi ya wakati kwa kutokuwa na soko na kuleta hasara kubwa kwa wafanyabiasara  jambo ambalo linaweza kuzuilika kwa elimu na uwezo wa kuzisarifu kisasa bidhaa hizo.

Wameyataja mazao hayo ya msimu kuwa ni pamoja na embe, tungule, machungwa, ndimu, nanasi na mengine mengi ambayo iwapo ungekuwepo uwezo wa kuyahifadhi yangeweza kuwa na tija zaidi kwa wakulima na wafanyabaishara kwa jumla.

Aidha wameomba pia kupatiwa elimu ya masoko pamoja na kuunganishwa katika mifumo ya masoko mbali mbali duniani katika kuhakikisha kwamba shughuli hizo za kibiashara zinakwenda vyema na kuwa na tija kwao.

 

Mwisho

Imetolewa na Ofisi ya Makamu wa Kwanza wa Rais wa Zanzibar kupitia Kitengo chake cha  Habari leo  Jumanne tarehe 12,Novemba 2024.