Waliohamishwa Kiwira walipwa chao

Na Thompson Mpanji, MBEYA

SERIKALI imeanza kuwalipa mafao　ya wafanyakazi　398, walioachishwa kazi katika　mgodi wa makaa ya mawe Kiwira, wilayani Kyela mkoani Mbeya na kuwapatia muda wa miezi mitatu kuishi katika nyumba zinazomilikiwa na ngodi huo.

　

Akizungumza na wafanyakazi hao katika ukumbi wa mgodi huo, Mkurungenzi wa Fedha na Utawala STAMICO, Peter Gembe, alisema kuwa serikali kupitia wizara ya Nishati na Madini imetoa shilingi bilioni 1.3 kwa ajili ya malipo ya wafanyakazi na watalazimika kuondoka ifikapo Septemba 30 mwaka huu.

　

Alisema kazi ya kuwalipa mafao wafanyakazi hao itadumu kwa muda wa wiki moja ikiwa pamoja na kuishirikisha mifuko ya fedha kwa wafanyakazi kama NSSF na PPF kupiga kambi katika eneo hilo ili kuhakikisha kuwa wafanyakazi hao walioachishwa kazi wanapata malipo ya michango yao waliyokuwa wanachangia.

　

Gembe alisema kuwa baada ya kumalizika kwa zoezi hilo STAMICO imejipanga kuendesha mgodi huo pamoja na kujiwekea lengo la kutaka kuendesha　 kisasa zaidi kwa kuleta vifaa vipya na kubadilisha mfumo wa uchimbaji wa makaa.

Alifahamisha kuwa mgodi huo utakapoanza kazi utakuwa na uwezo wa kuzalisha　 zaidi ya tani　 milioni moja kwa mwaka pamoja na kuwa na uwezo wa kuzalisha megawati 200 za umeme ambazo zitaingizwa moja kwa moja katika gridi ya taifa ili kuondokana na tatizo la umeme nchini.

　

Alisema kuwa mgodi huo mara utakapoanza kazi utatoa ajira zaidi ya 1,000 kwa wafanyakazi wapya ikiwa ni tofauti ya wafanyakazi waliokuwepo awali 500 na kuwaasa wafanyakazi walioachishwa kazi huku wakiwa bado wanazo sifa za kufanya kazi katika mgodi huo wavute subira ya kuomba upya kazi.

Kwa upande wake Mkuu wa wilaya Kyela Magreth Malenga, aliwataka wafanyakazi hao kukubali kile　ambacho serikali imekubali kuwalipa　na kuwataka　wale watakaolipwa kuhakikisha wanaondoka haraka kwenye nyumba hizo za mgodi ili kupisha　serikali kupanga mipango endelevu kuhusiana na mgodi huo

　

Aidha amewaasa wafanyakazi hao kutulia na ndoa zao mara baada ya kupata　mafao yao kwa maana ya kutafakari kwanza kabla kukurupuka　kwani itawasaidia　kuzitumia pesa hizo ipasavyo na kupambana na mazingira mapya wanayokwenda kuishi.

　

Wakati zoezi hilo likiendelea baadhi ya wafanyakazi walioachishwa kazi katika mgodi huo na kupokea hundi zao za fedha walionyesha kutoridhishwa na mafao waliyopata ambapo wamedai kuwa fedha waliyoipata ni kidogo kiasi kwamba hazitawawezesha kuishi maisha mapya.